
遍知贝玛嘎波大师教言集PK305བདེ་བ་ཅན་གྱི་སྨོན་ལམ་བཞུགས་སོ།།
24-475
༄༅། །བདེ་བ་ཅན་གྱི་སྨོན་ལམ་བཞུགས་སོ།།
༄༅། །བདེ་བ་ཅན་གྱི་སྨོན་ལམ་བཞུགས་སོ།། ༄༅། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་རྡུལ་མེད་ཅིང་རྣམ་པར་དག་པ་བཞུགས་ཤིང་འཚོ་ལ་བཞེས་ཤིང་ཆོས་ཀྱང་སྟོན་པའི་མཆོག་ལ་ཕྱག་འཚལ་ལོ། །
24-476
འོད་ཟེར་མཐའ་ཡས་མངའ་བས་འོད་དཔག་མེད། །དེས་ཀུན་སྣང་བ་མཆོག་སྤྱོད་སྣང་མཐའ་ཡས། །འབྱམ་ཀླས་སྐུ་ཚེ་ཚེ་དཔག་མེད་དང་བརྩེས། །སྤྱན་རས་གཟིགས་གསོལ་སྟོན་པར་ཕྱག་འཚལ་ལོ། །ཁྱོད་གང་མཉེས་པ་
ཀུན་ཏུ་བདག་འབུལ་ཞིང་། སྡིག་པ་ཐམས་ཅད་བཤགས་བགྱི་དེང་ནས་བཟུང་། །མགོན་པོའི་མཛད་པ་ཀུན་ལ་ཡི་རང་བས། །དགེ་བ་ཅི་བྱས་དེ་འགྲུབ་ཕྱིར་བསྔོའོ། །ཁྱེད་སྔོན་འཇིག་རྟེན་དབང་ཕྱུག་རྒྱལ་པོའི་དྲུང་། །
ཆོས་ཀྱི་འབྱུང་གནས་ཞེས་གྱུར་དགེ་སློང་དེས། །རང་གི་སངས་རྒྱས་ཞིང་བཟུང་ཇི་བཞིན་དུ། །བདག་ཀྱང་སྨོན་ལམ་འདེབས་ཀྱི་འགྲུབ་གྱུར་ཅིག །ཁྱོད་ཀྱིས་སེམས་ཅན་ང་ཡི་མིང་ཐོས་ཀུན། །ང་ཡི་ཞིང་དུ་
སྐྱེ་བར་གྱུར་ཅིག་བཏབ། །དེ་གྲུབ་མཚན་ཐོས་དད་པའི་ཤས་ཐོབ་པས། །གང་དྲུང་དེས་ཀྱང་མྱུར་བའི་སྐབས་དབྱེར་གསོལ། །ཁྱོད་ནི་གཞན་གྱི་དོན་མཛད་མེ་གཡེལ་དང་། །རྒྱ་མཚོ་དུས་རླབས་མེ་ཡོལ་མཚུངས་པས་
ན། །ཐུགས་རྗེའི་ལྕགས་ཀྱུ་རིང་པར་བརྐྱངས་ནས་སུ། །བདེ་བ་ཅན་དུ་ཡུད་ཀྱིས་དྲང་བར་མཛོད། །ཁྱོད་ཞིང་སེམས་ཅན་ཐམས་ཅད་སངས་རྒྱས་གྱུར། །རེ་རེས་མ་ཟློས་བསྐལ་པ་བྱེ་སྙེད་དུ། །བསྔགས་ཀྱང་ཟད་
པར་མི་འགྱུར་ཡོན་ཏན་ཅན། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་ཀྱི་འཇིག་རྟེན་ཁམས་ནི་མཐའ་མེད་ལ། །ལྷུན་པོ་འཁོར་ཡུག་མཚམས་ཡོད་མ་མཆིས་པ། །ཀུན་ཏུ་མཉམ་པ་ལག་པའི་མཐིལ་ལྟ་བུའི། །
24-477
བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་བཞུགས་རིན་ཆེན་སྣ་ཚོགས་གཞི་མོའི་སྟེང་། །ཞལ་བ་བྱས་འདྲ་ངན་སོང་ལྷ་མིན་མེད། །བདེ་ནས་བདེ་འགྲོ་གང་ལ་མི་ཆགས་པ། །བདེ་བ་ཅན་གྱི་
ཞིང་དུ་སྐྱེ་བར་ཤོག །ཁྱོད་གནས་སར་མི་གནམ་ལྷ་མིང་ཙམ་ཁྱད། །ལྷ་མོ་བདུན་སྟོང་བདུན་དང་རྩེ་བ་ཡི། །རིན་ཆེན་གཞལ་མེད་ལྷ་རྫས་མལ་སྟན་ཅན། །བདེ་བ་ཅན་གྱི་ཞིང་དུ་སྐྱེ་བར་
ཤོག །ཁྱོད་ཀྱི་སྐྱེད་ཚལ་ནོར་བུའི་ནགས་ལྗོངས་དང་། །སྤོས་ཆུའི་གླུང་ཆེན་སྤྲུལ་པའི་བྱ་དང་ནི། །མེ་ཏོག་གིས་གང་རིན་ཆེན་རི་ཕྲེང་ཅན། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་ཀྱི་བྱང་
ཆུབ་ཤིང་ཆེན་བལྟ་ན་སྡུག །སྟོང་དང་དྲུག་བརྒྱའི་དཔངས་དང་ཁྱོན་ལྔ་བརྒྱ། །ལེགས་བྱས་ཐམས་ཅད་སྣང་བའི་འཕྲུལ་ཆེན་པོ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་ཡུལ་དུས་དུས་རླུང་གི་ལྗོན་
ཤིང་ལས། །མེ་ཏོག་ཆར་བརྡལ་མི་རིང་བདུན་བརྩེགས་དཔངས། །མནན་ན་སོར་བཞི་ནིམ་གྱུར་བཏེག་འཕར་བ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་ཞིང་ལྗོན་ཤིང་ཀླུང་དང་རོལ་མོའི་སྡེས། །ཡིད་འབབ་
ཆོས་ཀྱི་དབྱངས་སྟོན་སྤོས་ཟས་དང་། །གོས་རྒྱན་བསམ་ཀུན་མོད་ལས་འབྱུང་བ་ཅན། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་སྨོན་གྱིས་མྱོས་ཕུན་སུམ་ཚོགས་པའི་སྡེ། །ཞིང་ཁམས་རྒྱ་མཚོའི་རྙེད་དཀའ་མ་ལུས་པས། །
24-478
རྣམ་པར་བརྒྱན་ཕྱིར་བལྟ་བས་མི་ངོམ་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་འཁོར་ལྔ་བརྒྱ་པདྨའི་མངལ་གནས་དང་། །དེ་ལས་སྐྱིལ་མོ་ཀྲུང་བཅས་མོད་སྐྱེ་གཉིས། །གསེར་མདོག་མཚན་དཔེས་སྤྲས་
པ་ཤ་སྟག་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་བསྟན་ཉན་ཐོས་དགེ་འདུན་དཔག་མེད་ཅིང་། །སེམས་དཔའ་དཔག་མེད་སྨོན་ལམ་དཔག་མེད་པ། །ཐམས་ཅད་ཚེ་ཡང་དཔག་ཏུ་མེད་པ་ཅན། །
བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་མཆོད་པ་ལ་བརྩོན་ཞིང་སྐད་ཅིག་རེར། །བརྒྱ་སྟོང་སངས་རྒྱས་ཞིང་ཉུལ་ཆོས་ཉན་པ། །ཀུན་ཀྱང་མངོན་ཤེས་རྫུ་འཕྲུལ་ཆེན་པོ་བསྐྱང་། །བདེ་བ་ཅན་གྱི་
ཞིང་དུ་སྐྱེ་བར་ཤོག །འཇིག་རྟེན་དབང་དང་མཐུ་ཆེན་ཐོབ་སོགས་སྲས། །འོད་ཟེར་དཔག་མེད་དེ་བཞིན་གཤེགས་ཉིད་བཞིན། །འགྲོ་བའི་ཕན་བདེ་སྦྱིན་ལ་སྟོབས་འགྲན་པ། །བདེ་བ་ཅན་གྱི་ཞིང་དུ་སྐྱེ་བར་
ཤོག །ཁྱོད་ཀྱིས་སྐད་ཅིག་རེར་བསྟན་ཆོས་ཀྱི་གྲངས། །སུས་ཀྱང་བགྲང་བར་མི་ནུས་དེ་འདྲ་བ། །རྟག་པར་ཉན་འཛིན་བློ་ཆེན་ཚོགས་པའི་གྲྭ། །བདེ་བ་ཅན་གྱི་ཞིང་དུ་སྐྱ་བར་ཤོག །ཁྱོད་མཐུས་སྐད་
ཅིག་རེར་ཡང་ཏིང་འཛིན་སྒོ། །བརྒྱ་སྟོང་བྱེ་བ་སྙེད་འགྲུབ་དེ་ལྟ་བུས། །དཔག་མེད་སྲིད་པར་བསམ་གཏན་བསྒོམ་པའི་གླིང་། །བདེ་བ་ཅན་གྱི་ཞིང་དུ་སྐྱེ་བར་ཤོག །ཁྱོད་བྱིན་འགྲིབ་པའི་གནས་སྐབས་ཀུན་བགག་ཅིང་། །
24-479
གོང་དུ་སྤེལ་ལ་མཚུངས་པ་མེད་བརླམས་པས། །ཡོན་ཏན་འདོད་པ་ཐམས་ཅད་བདག་བཞིན་དུ། །བདེ་བ་ཅན་གྱི་ཞིང་དུ་སྐྱེ་བར་ཤོག །བདེ་བ་ཅན་གྱི་སྨོན་ལམ་དཀོན་མཆོག་བརྩེགས་པའི་འོད་དཔག་མེད་
ཀྱི་ཞིང་བཀོད་ལས་ཕྱུངས་ཏེ་པདྨ་དཀར་པོས་ལོ་གྲོར་རོང་ལྗོན་ནང་ཞེས་བྱ་བའི་གཙུག་ལག་ཁང་དུ་བྲིས་པ་བན་བཙུན་རྒྱལ་བ་བཟང་པོ་ལ་སོགས་པའི་དོན་གཉེར་བ་ཐམས་ཅད་བདེ་བ་ཅན་
དུ་སྐྱེ་བར་གྱུར་ཅིག། །།


